استانا قالاسىنىڭ 20 جىلدىعىنا وراي الماتى مۋزەيىندە «ەل جۇرەگى – استانا» كورمەسى اشىلدى.
كورمەنىڭ ۇيىمداستىرىلۋى قالا تۇرعىندارى مەن قوناقتارىن ەلوردانىڭ تاريحىمەن تانىستىرۋ, سوناۋ سارىارقا تورىندە ورنىققان عاجايىپ قالانىڭ تاريحىنا ۇلەس قوسقان قازاقستاندىق ساۋلەتشىلەردىڭ ەڭبەگىن ناسيحاتتاۋدى ماقسات ەتەدى. استانادا بوي كوتەرۋگە ءتيىستى نىسانداردىڭ العاشى جوبالانۋى مەن جۇزەگە اسىرىلعانعا دەيىنگى كەزەڭدەرى, سونداي-اق ەلوردانىڭ كەلەشەگىنە قاتىستى جوبالار دا كورمەدەن ورىن العان.
جاڭا استانانىڭ بوي كوتەرۋى ارينە, وڭايعا سوققان جوق. باس قالانىڭ قۇرىلىسىنا ەلىمىزدىڭ ءوندىرىس ورىندارى, قۇرىلىس كومپانيالارى اتسالىستى. تۇركيا, يتاليا, فرانتسيا, شۆەتساريا, ت.ب. ەلدەردىڭ ساۋلەتشىلەرى مەن قۇرىلىسشىلارى تارتىلدى. «جۇمىلا كوتەرگەن جۇك جەڭىل» دەمەكشى, اينالاسى ون جىل ىشىندە قازاق دالاسىندا كەلبەتتى قالا بوي ءتۇزدى. ال استانانىڭ كوشىرىلۋىمەن بىرگە ەل دامۋىنىڭ جاڭا كەزەڭى باستالدى.
كورمەنىڭ سالتاناتتى اشىلۋىندا الماتى قالاسى مادەنيەت جانە ارحيۆتەر باسقارماسىنىڭ تاريحي-مادەني مۇرالار ءبولىمىنىڭ جەتەكشىسى ن.ا.كاكيجانوۆا قۇتتىقتاۋ لەبىزىن بىلدىرسە, استانانىڭ بوي كوتەرۋىنە ءبىر كىسىدەي اتسالىسقان ەلىمىزدىڭ قۇرمەتتى ساۋلەتشىسى تولەگەن ءابىلدا استانا جوباسى باستالعان العاشقى جىلدارداعى ساۋلەت جۇمىستارىنىڭ قالاي جۇزەگە اسقانى تۋرالى ەستەلىكتەرىمەن ءبولىستى.
استانانى جوبالاۋعا قاتىسقان, بۇگىندە ومىردەن ءوتىپ كەتكەن قالدىباي مونتاقاەۆتىڭ قازاقستان ساۋلەتىنىڭ تاريحىنداعى ورنى ايرىقشا. ەڭبەك جولىن «الماتىگيپروگور» مەكەمەسىندە ساۋلەتشىلىكتەن باستاعان قالدىباي مونتاقاەۆ الماتى ساۋلەتىمەن قاتار استانانىڭ دا قالىپتاسۋىنا اتسالىستى. 1996 جىلى ونىڭ باسشىلىعىمەن ساۋلەتشىلەر توبى استانانى دامىتۋدىڭ باس جوسپارىن ازىرلەۋ بايقاۋىندا جەڭىپ شىققان بولاتىن.
كورمە قوناقتارىنا ساۋلەتشىنىڭ جارى جىبەك رامازانقىزى مەن يتاليالىق ديزاينەر فرانچەسكو كاپيلەتتي قالدىباي مونتاقاەۆتىڭ كۇش-جىگەرىن, ونەرىن سالىپ جاساعان جوبالارىنىڭ بۇگىندە ءزاۋلىم عيماراتتارعا, زاماناۋي قالاعا اينالعانىن تاڭدانىسپەن جەتكىزىپ, ساعىنىشپەن ەسكە الدى.
كورمەگە كورىك بەرىپ تۇرعان ت.ءابىلدا, ش.ماتايبەكوۆ, ي.يمانقۇلوۆ, ا.ساۋمەنوۆ, يا.ەزاۋ, ۆ.كۋشەنكو, ا.رۇستەمبەكوۆ, ت.ەراليەۆ سياقتى ەلىمىزدىڭ تانىمال ساۋلەتشىلەرى جاساعان عيماراتتار ءوزىنىڭ عاجايىپ ءسان-سالتاناتىمەن ەرەكشەلەنەدى. كورمەگە كەلۋشىلەر ءۇشىن ءار جوبامەن تانىسىپ, كەڭىنەن اقپارات الۋىنا مۇمكىندىكتەر قاراستىرىلعان. تامىز ايىنا دەيىن جالعاساتىن استاناعا ارنالعان كورمەگە قالا قوناقتارى مەن مادەني ورتالىقتاردىڭ وكىلدەرى قاتىستى.
ەلۆيرا سەرىكقىزى,
«ەگەمەن قازاقستان»
الماتى